طارط كلاصي بموس شوكولا و كريمة الليمون

مقادير البسكوي 150غ زبدة 200غ الشكلاط 120غ صفار البيض 180غ بياض البيض 150غ سنيدة 50غ مايزينة 50غ طحين

طربي بياض البيض مع 75غ السنيدة حتا تولي كالثلج

طربي صفار البيض مع باقي سنيدة يعني 75غ

خدمي الزبدة مزيان حتا تولي بوماد وزيدي عليها الشكلاط مذوب و حركي مزيان زيدي صفار البيض مطرب مع 75 غ سنيدة ثم الطحين و المايزينة و خلطي مزيان

زيدي بياض البيض غير بشوية حتا تنساجم جميع المقادير

بالنسبة للطياب كاين طريقة العادية تسرحي الخليط فطاوة و دخايها طيب تقريبا 20 دقيقة و تخرجي منها 2 بيسكوي يكون الحجم ديالهم أصغر من الحجم لي غادي نعمرو فيه الحلوة أو ممكن تاخدي الجيب الحلواني عمري بيه الخليط و عمري الاطار دائما يكون اصغر

مقادير كريمة الليمون

200غ عصير الليمون معلقة كبيرة قشور الليمون 50غ صفار البيض 50غ سنيدة 20غ الزيدة ورقة ونصف جيلاتين

نطربو صفار البيض مع السنيدة نغليو عصير الليمون مع قشور الليمون ناخدو منو شوية نزيدوه على خليط البيض نحركو مزيان عاد نزيدوه على باقي العصير و ونضيف الزبدة و نحركو شي 10 دقايق و دوب الزبدة نحيدوه من فوق العافية و نزيدو الجيلاتين مرطب فالماءو نصفيوه و نكبوه في اطار قد هاداك لي صاوبنا بيه البيسكوي ندخلوها الفريكو تجمد

يتبع…

مقاديركروستيون

75غ فايتين ايلا مكانش ديري كورن فليكس 50 شكلاط اسود 75 براليني اللوز

كدوبي الشكلاط مع شوية الزبدة كضيفي براليني ثم الفايتين انا مكانش عندي براليني و حتا شكلاط ماكافيش درت غير الكراميل

نسقيو البسكوي غير شوية بسيرو منسم بالقهوة ايلا مبغيتوش تسقيوها بلاش

نسرحو من فوقها الكروستيون

مقادير لاموس بالشكلاط

ربع لتر كريم فريش +30 غ سنيدة 2 صفار بيض 2 وراق و نصف جيلاتين 50 غ سنيدة نصف كاس صغير ماء 200 غ شكلاط اسود cl12 كريم فريش

نحضرو سيرو بالماء و سنيدة

نطربو صفار البيض و نزيدو سيرو لي ضفنا ليه الجيلاتين مرطبة فالماء حتا يولي لونو بيض و يتعقم

ندوبو الشكلاط مع الكريم فريش

نضيفو للبيض حتا تنساجم المقادير و نزيد الكريم الفريش المطربة مع 30غ السنيدة

كناخدو اطار نفرشو تحت منو بلاستيك و في الداخل ندورو بيه شريط بلاستيكي كنعمرو الجيب الحلواني بلاموس نديرو طبقة ديال لاموس ناخدو موس و نجرو جوانب الاطار

نديرو طبقة ديال بسكوي الشكلاط نديرو طبقة رقيقة ديال لاموس

ثم طبقة كريمة الليمون

ثم طبقة رقيقة ديال لاموس ثم طبقة ديال بسكوي لي فوقها الفايتين

نزيدو لاموس من جناب و نقادوهم بالموس ندخلوها الفريكو ليلة كاملة

مقادير الكلاصاج

300غ شكلاط اسود 25غ كاكاو 2 اوراق و نصف جيلاتين ربع لتر ماء 100غ سنيدة

نغلي الماء و سنيدة و الكاكاو حتا يولي سيرو

نزيدو على الشكلاط و نحركوه مزيان و نزيدو الجيلاتين مرطب فالماء نحركو حتا ينساجم العناصر و نصفيوه ونحتافضو بيه فالثلاجة حتا نبغيوه داير بحال المرايا

طريقة التزيين كناخود بلاستيك ديال الزخرفة ديال الشكلاط

كندوب الشكلاط و كنسرحو فوق البلاستيك

نخليوه حتا يبرد شوية و نشكلو اشكال حسب الرغبة

ندخلوهم الفريكو كتا يبردو مزيان و نحيدوهم بشوية لاي يتهرسو