حياتي الزوجيه من زواجي لليوم

السلام عليكم ورحمة الله وبركاته.

اليوم أنا قررت اكتب لكم احداث حياتي الزوجيه من زواجي لليوم لأن عن جد مو عارفه شسوي وتعبااانه نفسيآ

وجسديآ ,, مو عارفه آخذ قرار افكاري متشوشه ويمكن آرائكم تساعدني وتهون علي

قبل 7 سنوات تقريبآ كان زواجنا ,, كنت عايشه احلى أيام حياتي مع زوجي ,,حملت بنفس الشهر اللي تزوجت فيه

يعني تزوجت شهر 2 شهر 3 ماجاتني الدوره ,, الكل كان فرحان ومبسوط ,, فترة حملي كان فيه بعض المشاكل مع زوجي وهالشي طبيعي ,, يعني كان يجذب

علي على اشياء تافهه مثل التدخين يعني اللي اعرفه ان قبل الزواج كان يدخن وقالي ان اهو قطع التدخين من يوم خطبني ,, مع الأيام اكتشفت ان زوجي يدخن

وقبل لا يدخل البيت يغسل اسنانه بالحمام الخارجي للبيت ,, صارت مشاكل بسبب التدخين مو لان يدخن لا لأن جذب علي وماكان له داعي يجذب علي بشي سخيف ,, عادي مرت الأيام

وأنا اموت في زوجي احبه حب مو طبيعي وكنت مرتاااااااحه ولله الحمد ,, مرت الأشهر

وولدت ,, جبت له ولد مثل القمر لا إله إلا الله ,, كنت أخاف على ولدي بصورة مو طبيعيه ,, يعني مستحيل أخلي حد يشيله بس أنا اللي اشيله

واغير له وارضعه بصراحه مو مني كان في شي بجبرني اسوي جذي شنو هالشي الله العالم ,, مرت الأشهر وصار عمر ولدي 3 أشهر تقريبآ في يوم من الأيام من غير ماادخل في تفاصيل ,, شفت زوجي يمارس الجنس مع وحده غيري ,, أقسم بالله العلي العظيم داااااارت فيني الدنيا وكنت اضرب راسي واقول لا هذا مو زوجي وارد اركز فيه اكثر واقول بلى هذا زوجي القميص اللي عليه أنا اللي كويته !! ,, بكيت بكااااء

ومن كثر ماكنت منهاااره كان زوجي يضربني على وجهي بالقوه وأنا مااحس بشي غير الناااااااااار اللي في قلبي ,, هدئت شوي وقلت لزوجي خلاص ماصار شي أنا بسوي روحي ماشفت وبعديها عشان ولدي وعشان الحب اللي احبه لك ,, وهو وعدني

وحلف ان مايعيدها وانها كانت نزوه في مفس الليله رجعت مع زوجي البيت وماكأن صاير شي بس مااخفي عليكم كان نار تاكل قلبي كل يقرب صوبي واتذكر الوضع اللي شفته فيه وهو في احضان وحده غيري ويسوي معاها مثل مايسوي معاي بس كنت اذكر الله واستغفر وادعي ان الله يمسح على قلبي عشان اقدر اواصل حياتي ,, والحمد لله رجعت اثق في زوجي اكثر من قبل!

واصلت حياتي معاه ,, ماقصرت ولا بشي كل اللي اقدر عليه اسويه ماانكر إني عصبيه وفي أوقات اطلع من طوري واعصب على اتفه الأسباب بس في نفس الوقت اهدئ واعتذر منه واصالحه ,, بعد سنه ونص حملت للمره الثانيه

وأنا في الشهر الثالث في نص الليل واحنا نايمين كان تلفون زوجي يرن رنات بسيطه ويسكر ,, الصبح قعدت من النوم

وقلت لزوجي ان تلفونه طول الليل يرن ااخذ التلفون وطالع الارقام وسكت وانا بعد سكت ماشكيت فيه ولا ثانيه بس تلفونه طول اليوم ماسكت كل شوي يرن وزوجي يطلع برى البيت ويرجع مره ثانيه استمر الوضع الى العصر آخر مره رن وتلفونه وطلع أنا شكيت لبست عبايتي وطلعت وراه شفته دخل البقاله دخلت وراه وقف في البقاله وماكان في احد غير الهندي وانا وهو أنا كنت واقفه وراه وهو ماعطيني ظهره وماشافني سمعته يتكلم مع وحده ويقول لها أنا ابغي اقعد معاج وامسك يدج في هاللحظه اهو افتر وشافني وراه بالضبــــــط الوانه تغيرت وكانت صدمه بالنسبه له لأن ماتوقع ان يشوفني رجعت البيت وهو رجع وراي أنا انهرت وكسرت العطورات وكسرت اغراضي وضربت بطني وكنت اصرخ واقوله انت خاااااااين خاااااااين وهو يهديني ويقولي اسمعي الموضوع ,, هديت

وقالي ان هالبنت مو له هالبنت صاحبة رفيجه وان كان يحل سوء تفاهم بينها وبين رفيجه وان اللي سمعته كله كان سبب سوء التفاهم ,, صدقته وعديت الموضوع ومشيت حياتي معاه ,, مرت الأيام

وولدت الحمد لله ,, بعد ولادتي كنت الحمد لله مرتاحه ومستانسه بأولادي وزوجي يعني كنت اعتبر نفسي عايشه حياة مثاليه مع عائلتي ,, في يوم من الأيام كان يوم جمعه قعدنا من النوم وزوجي اخذ الأولاد وراح يشتري لنا ريوق وأنا كل مااتصل لزوجي وتلفونه مشغوووول تأخر وانشغل بالي عليهم ,, بعد ساعه يمكن رجع البيت

وانا كنت خلال هالساعه اتصل له وتلفونه كله مشغول ماقلت له اني اتصلت ولقيت تلفونه مشغول يعني مافاتحته بالموضوع حطيت الريوق وقعدت مع زوجي وأولادي وتفطرنا ,, شفت زوجي انشغل شوي خذيت تلفونه

وخذيت آخر رقم اتصل عليه ,, اتصلت من تلفوني وردت علي بنت وسكرت الخط وقلت له اني خذيت الرقم من تلفونه وردت علي بنت قالي هذي متصله بالغلط وانا كنت اتفاهم وياها ,, عديت الموضوع

ومشيت حياتي معاه ,, بعدها زوجي قام يطلع ويسهر برى البيت بكثره مايرجع البيت إلا الفجر ولما اكلمه يقولي انا رجال ومن حقي اغير جو ,, جاء فصل الشته

ونصبوا لهم خيمه في البر وكان ينام برى البيت باليومين ,, في يوم رجع البيت وانا خذيت جواله وشفت فيه مقاطع إباحيه لخليجيات يعني مقاطع فااااااااضحه التصوير كان شي ماادري شلون اوصفه قلت له شنو هاي اللي في تلفونك قالي انا حطيتهم لج ابي اراويج يمكن تستانسين !!! قلت له استانس على هالمقاطع وتهاوشت وياه واعتذر ومشيت الموضوع ,, بعدها بكم يوم هو كان بايت في البر وكل مااتصل له تلفونه مسكر ,, اتصل فيني من تلفونه اخوه وقالي اي وقت تبيني اتصلي على تلفون اخوي لان تلفوني خربان ,, رجع البيت بعد يومين

وكأن في حد يقولي افتحي بطارية تلفون زوجج ,, فتح التلفون وشفت عنده شريحه ثانيه كان يستخدمها وهو برى البيت وكان يجذب علي يعني تلفونه مو خربان ,, تهاوشت

وياه واعتذر لي ومشيت الموضوع,, مرت الأيام معاه وهو لاهي بحياته طلعات ويه ربعه ويبات برى البيت ومايدري عني ولا عن أولادنا ,, وأنا كنت صابره واقول ماعليه باجر يرد لعقله ويعرف قدري عنده ويعوضني خير ,, مشت لسنين

والحال مثل الحال كله برى البيت ومايصرف علينا وكله يقول ماعندي فلوس ,, ماقدر اتحمل الوضع وقدمت على وظيفه والحمد لله قبلوني واشتغلت وصرت اصرف على أولادي ومااطلب منه شي كانت فلوسي كلها تروح على اكل ولبس للأولاد حتى جوتي وانتوا بكرامه كنت استكثر اشتري لروحي كنت اروح الدوام بجوتي منشق كنت الصقه بسوبرقلو واقول ماعليه تقزيره ,, مرت لسنين وانا اشتغل واصرف على عيالي وهو مثل ماهو ماتغير ,, في يوم كنت العب بجواله وشفت مسجات من وحده واجهته وقالي هذي زميلتي في الدوام وكانت تبي مني شغله وصارت بيننا مسجات تهاوشت وياه ويوم ثاني تنومت في المستشفى وسويت عمليه ,, طلعت من المستشفى

وسويت روحي ناسيه الموضوع ومشيت حياتي معاه ,, قبل كم شهر اكتشفت ان زوجي عنده تلفون ثاني وربي كانت صــــــــــدمه قلت له اني اكتشفت التلفون الثاني وصار كلام مني ومنه وانا ابكي ومنهااااااره واقول معقوووووله بعد كل هالصبر للحين يخوني !!!

قالي ان هالتفون مو له لرفيجه ورفيجه متزوج وكان مخبي التلفون عنده عشان زوجته ماتكتشفه !!! وقالي إذا تبين بخلي رفيجي يتصل ويقول لج ان التلفون تلفونه ,, قلت له مو صعبه خلاص انا ماعاد عندي ثقه فيك إذا تبغيني أصدق لازم رفيجك يعترف جدام زوجته ان التلفون له مو لك وساعتها بس بصدق ,, قالي لا مايصير تبغين تهدمين بيته قلت له يا انت تهدم بيتك يا رفيجك يهدم بيته لأني خلاص ماعاد اتحمل ,, ظليت في بيت اهلي شلته من بالي وصرت افكر في نفسي وعيالي وامي وبس كنت اطلع وياهم نغير جو ونستانس مرت الأشهر وهو مايدري عني ولا عن أولاده ولا احد من اهله يتصل يسألني إذا الأولاد محتاجين لشي ,, صار فيه بعض المكالمات بيني وبينه

وكنا نتهاوش فيها طبعآ انا طلبت الطلاق اكثر من مره ,, وهو رافض يطلقني ,, قبل كم يوم خالتي اتصلت له وصار بينهم نقاش وهو اعتذر وقال لخالتي انا مستعد اعوضها وانا توني حسيت بقيمة زوجتي وعيالي وكلام كثير ,, خالتي اتصلت لي

وقالت لي الكلام اللي دار بينهم وقالت لي عطيه فرصه أخيره لعل وعسى يعتدل ويصير رجال ,, قلت لها انا بفكر واللي فيه الخير يقدمه رب العالمين ,, عشت كم يوم في حاله نفسيه مو طبيعيه ماآكل ولا اشرب ولا اي شي غير البكى طول اليوم ابكي مو قادره اتخيل روحي ارجع له مره ثانيه احس نفسي عفته مو قادره اتقبله ,, قلت حق أمي انا خلاص ماعندي حل ثاني غير اني ارجع لزوجي ,, مرت الأيام

وقرب العيد !! وانا حاليآ قاعده بالبيت لأني استقلت من كم شهر بسبب العمليه (( عندي حصى والتهاب وتوسع في الكليتين وحصى المراره ) والشهر الجاي بداوم في شغل جديد ان شاء الله وزوجي ماطرش فلوس حق عياله يعني للحين ماشريت حق عيالي ولا شي للعيييييد ,, للعلم اهو حتى اغراض لرمضان ماجاب لنا قال لأمي ماعندي فلوس من وين اجيب اسرق !!

كل هالتصرفات اللي تبذر منه مخليتني مو متقبله رجوعي له مع اني ضغطت على نفسي وقلت ماعليه هونيها وتهون عشان خاطر الأولاد مايتشتتون بس مو عارفه شسوي عن جد محبطه نفسيآ مو عارفه شسوي وشنو القرار اللي لازم آخذه عشان ماأخسر حياتي ,, ارجع اعيش معاه بس عشان الأولاد ؟؟ يعني ارجع للمشاكل اللي ماتخلص وفوق هذا عيالي بيتعبون من كثر المشاكل ,, اصر على رايي

واتطلق منه واعيش حياتي لتربية أولادي واريح نفسي من المشاكل ولا شنو الحل اللي لازم آخذه ,, انتوا شنو رايكم ,, كل وحده تحط نفسها مكاني وتقولي شنو راح تسوي لو كانت مكاني لاسمح الله,, ادري طولت عليكم بس عن جد محتاجه لحد يوقف صوبي حتى لو بدعوه تحفظ لي عيالي وتطول بعمر أمي.

كانت هذه حياتي الزوجيه من زواجي لليوم.