خااااايفة من واليدية لا يرفضوه

أنا بنت عندي 23 سنة و خااااايفة .

بكل اختصار كنعرف واحد الرجل هو كل حياتي..

كنموت عليه و حتى هو، واللي خلاني متأكدة من احساسو هو صبرو ووقوفو معايا ديما وعمرو فرط فيا فأي موقف، علاقتنا مدتها لحد الآن عام و مازال مستمرة الحمد لله مشحونة بكل الحب و الشغف و الاحترام..

ورغم كل العراقيل اللي صادفاتنا معمرو تخلا عليا خصوصا أني تعرضت لبزاف دالاهانات من طرف حبيبتو السابقة واللي خلاها لأنها كتخونو المهم علاقتي معاه صافية نقية و أنا معاه كنحس كل السعادة واخا هو عصبي ولكن كنتحملو لانو قلبو بيض ودغيا كيندم.. و انا كنسامحو فرمشة عين، هو كيتهلا فيا بحال مراتو و ديما جنبي بحكم أني كنتابع الدراسات العليا فمدينة لي هو فيها بعيد عن والديا، ونفس المدينة فيها الاخ ديالي اللي حتى هو كيعرف هاد الرجل وكيعرف علاقتي بيه و تكلم معاه وقالو نيتو معايا وأنو غيجي يخطبني فور إنهائي الدراسة خصوصا أني بقالي عام واحد فقط سمحولي طولت، المشكل اللي مخوفني بزاااااااف هو والديا…

هاد الشاب مسكين ظروفو العائلية خلاتو قرا غي شوية من مورا الباك واخا الباك ديالو مخييير ونقطة زوينة و ميزة، واضطر اخدم بسرعة باش يعاون ماماه، وهاد الظروف أنا مقدراها وحاسة بيه ومعنديش مشكل خصوصا أننا إذا تزوجنا غادي نسكن معا ماماه لأنه هو اللي عندها وكايجيوه فرص عمل خارج المغرب أو فمدينة أخرى وبمدخول ممتاز.

مكقدرش لا يمشي لا يدي ماماه معاه لأسباب خاصة، وحتى خويا مدعم التفكير ديالي، لكن أنا خايفة نتعذب مع والديا أو يرفضوه نهار يجي للدار.. هاد الخوف قاتلني وكل ما تكلمني ماما على الزواج كنلاحظ أنها كتحلم اكون زوجي حسن مني فالقراية وخدام مزيان… أي أم كتبغي بنتها تعيش حسن منها، ولكن أنا كنبغيه هو، مستحيل اقيسني راجل غيرو وحلمي هو نهار نتزف ليه… ومنقدرش نتخلا عليه لأني ماشي مادية و كنبغييييه…

عاونوني ونصحوني لوجه الله..

و دعيوا معايا.

كانت هذه قصتي و انا خااااايفة من والدية لايرفضوه.