قصة حياتي

اليك قصة حياتي

انا تزوجت سنة 2011 و عشت حياه سعيده مع زوجي و استمر زواجنا لمدة سنة و نص , و سكنت مع اهله و كانت عندي غرفة و حمام عاد الله لا يراويكم من اهله , امه و ابوه كانو مثل العسل بس خواته اعوذ بالله منهم مرت الايام و الاشهر , طبعا يرزون بويهم بكل شي حتى الاكل اللي كنت اسويه حقه يحطون عينهم عالاكل , حتى يوم ادخل المطبخ يطرشون حد وراي يراقبني …

و كنت وايد احب ادلع عمري , يعني كل شهر كنت اسير اسوي بدكير و منكير و حمام زيت و اسير النادي عشان احافظ عرشاقتي , و بما اني مخلصة دراستي ,

كنت احس ان كلامهم و عقلهم مال اليهال و كنت امشي , و صلت المواصيل انهم يبوني اصرق من بوقه واجمع من وراه و كانو مقسمين معاشه بالتفصيل مع البيانات و عطوني اياها بورقة ,

طبعا انا !!! سرت غرفتي و طريت الورقة ولا كانه صاير شي , و مشيت و لا كان شي صاير , وصلت المواصيل ان بنت خالته تلحقني بسيارتها و انا كنت سايرة ماكدونالز خذيتلي عصير برتقال و سرت الستي كان ناقصني كمن غرض , وصلت و نزلت و انا ظاهره جان اشوفها و يوم واجهتها قالتلي لا مب انا و شو مصلحتي الحقج …

سرت الحج سنة شهر 10 , و كانو خلاته موجودين , قتله يولد الناس ما يستوي انا وياهم احس ان بيستوي تج بينا , و قالي لا تتهيان يبنت الناس , قلت حاظر و اتمنا اني اكون غلطانه , بعد مرور اسبوع خالته هزبتني جدام كل الحريم و قالتلي يالعميا و كنت حاطة ملابسي الداخلية عالسرير عشان برتبهم و جان تقولي انتي مب متربيه تتوقعون ليش ؟ عشان الهاف و الستيان نفس الشي ..

من كثر قهري ما رمت ارقد و رمسته الصبح عشان يغير المكان , و تغير و لله الحمد , بعد فترة استوت مشاكل واااايدة و قررنا ان ننتقل بشقة بس امه و ابوه ما طاعو و قالو نحن مب راضين , قتله يولد الناس هايلا امك و ابوك اذا ما طاعو اخاف ما نتوفق و اتاجلت الفكرة .. قبل رمضان بشهر ذهبي مال الزهبة اختفى , لا مب اي ذهب ,

الذهب اللي هم يابوه , طبعا خبرته و قرر ان يخبر الشرطة و خبر ابوه , و انا ما كنت شاكة باي شخص .. طبعا ابوه يوم عرف زارنا بالغرفة , و قدمتله ماي و ما طاع يشرب و تم يقولي هاي اهانه حق اهل البيت , كيف انتي تتكلمين جي اكيد انتي متصرفه بالذهب , طبعا احترام حق زوجي سكت .. وبعد يومين قالي خذي البشاكير وديهم السوق عشان انا ادور براحتي و خذتهم و بعد ساعة دقلي و قالي تعالو و انا سرت جان يحصل طقم و حيول و خاتم بكبت اللحافات ..

المهم خذو البشاكير 3 و حقق و ياهم و قالو ما نعرف و اتطورت السالفة للنيابة و ما حصلو شي و القضية تصكرت و افرجو عن البشاكير , بعد هالسالفة باسبوع وحده من الصغارية قالتلي انتي حرامية و جان اهزبها .. كانو يطرشون مرت اخوهم العود و تنقلهم كل اخباري بس انا ما اخبرها بشي و كانت تروح تنقل لهم كلام مب تمام عني و هو خبرني و قال انتي قلتي حق ام فلا ………

قلت لا انا لو قلت بقول ان انا قايله بس ما قلت شي .. قبل رمضان باسبوع و كان يوم اليمعة كنت ابا ادخن الغرفة و كان شي جيس زباله كرمكم الله , سرت و خذته و قلت بحطه بره و بدخن الغرفة , عشان الغرفة ما تخيس و جان افتح الباب , الله ستر ما فلعوني الصغارية بالكره عويهي, و جان اسيرلهم و اقول حبايبي منو جي سوا ؟

هم زايغين مني بس ما تكلمو … كسرو خاطري و ما قلت شي , سرت عالاساس باخذلهم حلاو و بعطيهم ولا اسمعلكم اخته تهزب و تقولهم انا ما خبرتكم ما تلعبون فوق عشان هالاشكال ( اللي هي انا ) ما اتفلسف عليهم , جان اقولها لو سمحتي لا تقولين جي , جان تقول هالاشكال ساكتين عنها و لا تتكلم بعد …

سرت غرفتي اتزهب عشان بسير بيت ابوي و انا نازله جان اشوفها هي و ابوها و امها و سرت اسلم عابوه لاني ما شفته , و انا داخله قتلها مالج حق تكلميني جي , و جان ابوها يهزب و يقول تحطين عقلج بعقل الصغارية , قتله لا بس بخبرك السالفة , جان يطردني .. و انا طالعة من الغرفة قتلها حسبي الله عليج و نسايبهم و اخوانهم كانو موجودين ..

بعد يومين من هالموضوع اللي استوى دقلي و قالي بنسير نتغدى , قلت اوكي ليش لا , و نحن سايرين قالي حصلت حل يرضي كل الاطراف و هو ان ننفصل , انا مستغربة !! قتله ها مب حل هم يبوني و يبون يزوجونك و حده من هواهم , و قالي لمي كل اغراضج بوديج بيت ابوج , طبعا اكيد بتقولولي لازم ادفعين عن حبج , انا دافعت بس هو و صل لمرحلة انه يختار يا امه و ابوه ولا انا ….

هو اختارهم عشان هو يخاف عمشاعرهم و رضاهم , المهم وداني بيت ابوي و مره يقولي بطلق و مره ما بطلق , لين ما اهلي درو و يو يبون يعرفون شو السالفة و قايل اذا اهلج يو بيستوي تج كبير و نحن جي و لا جي بننفصل , قتله انت كيفك العصمه بيدك مب بيدي و يو اهلا و قالي لا ما بطلق , قتله انا مو لعبة قولي يا ابيض و لا اسود…

اول يوم رمضان انا بيت ابوي و بعد يوم او يومين قالي خلاص بطلق , قتله عندي كمن غرض ابا اخذهم قالي لا , حتى استخسر فيني الم باجي اغراضي و طرشهم بيت ابوي , و قبل ما اسير بيت ابوي قتله ليش الطلاق ؟

قال اذا تميتي بظلمج و اهلي بيظلمونج و انا مشيت , و قايل حق ريل اختي كلام ثاني , و بعض الاشياء اللي قالها غلط مسكتني اختي و قالتلي تبينه و لا لا , يوم قالتلي شو قايل حق ريلها قتلها , لحظة انا ابا اعيد حساباتي , قتلها اللي ما يباني انا ما اباه و عدت الايام و كان يتواصل و ياي عالواتسب و يحاول ينرفزني , بس قتله انت ما تبيني كل اللي عندي قتله حبيت تصدق صدق ما حبيت ها شي راجعلك ..

بعد يومين طرشلي عالواتسب , تعالي النيابة باجر الساعة 9 تخيلو كيف انا مب مستوعبة , يعني هو كان يقول الموضوع تصكر و بعدين تعالي النيابة , قتله ليش ؟

مب انت قايل الموضوع تصكر , قال لا ابوي سار ياخذ جوازات البشاكير و البشاكير مخبرين المحقق عني و ان شي مشاكل و انا اصلا ما يخصني فيهم و المحقق جايسنه فضول يبا يحقق و طالبني, فالواقع هاي خطة ابوه يبا يمشكلني و نفس ما انتو عارفين اذا التحقيق ما خلص كل اللي يستوجوبهم بيكونون بالسجن يعني هو يبا يوديني بالسجن , من بعد هالموضوع عفته و قلبي تصكر و قلت لو يبوس ريلي ما في رده له تصورو كان يقولي انا مرتاح وياج و انتي مريحتني و اصلا ما بحصل وحده تسوي نفس ما انتي تسوين لي ..

و حتى البيت يوم يكون فاضي اخوه يكون ظاهر و يرد باوقات عجيبة و هو عارف ان امه محد و الله كنت انزل وداسه السجين اخاف ععمري هو بيطلق بعد العيد ان شا الله , بس مب معناته نهاية العالم لا بالعكس حياة يديدة و هو الخسران ..

شو رايكم ؟؟؟